Транзицијата на разни тимови и професионалци од други поврзани индустрии кон гејмингот веќе не е новост, но сè уште не се случува пречесто. Затоа решивме да зборуваме со Иван Васиљевиќ, основач на студиото Digital Asset Tailors, кој е и извршен директор на тимот и кој го водеше нивното пренасочување во гејмингот.
Тимот започнал со идејата да биде тука за други големи студија во областа на создавање на асети, но со тек на време станал „целосна постпродукциска постројка“ главно во областа на реклама, па филм, а од неодамна и сцени во видеоигри.
Сигурно им оди добро затоа што осумчлениот тим од Белград неодамна доби награда за една од сцените на којашто работеше. Прочитајте какво им било искуството, кои алатки ги користеле и што мислат за гејминг индустријата досега.
SGA: Зошто реши да почнеш да работиш и со клиенти од гејминг индустријата?
Иван: Всушност, нашите клиенти почнаа да работат со клиенти од гејминг индустријата, па тоа веднаш се одрази на дополнителниот вид на проекти на коишто работевме. Секако, и самите се движиме натаму и ова сè уште ни е тековен процес.
Причината за тоа е попозитивно искуство во споредба со традиционалниот маркетиншки пристап на рекламните проекти на коишто работиме. Колку е подиректна врската помеѓу гејминг компанијата и 3Д-трговецот, толку е полесна и подобра комуникацијата. Има директна комуникација помеѓу проблемот презентиран од гејминг компанијата и решението на проблемот понудено од 3Д-трговецот, што во случајов сме ние. Ова важи и за реклама, но роковите во гејмингот некако се пофлексибилни. Тоа што го правиме го нема на телевизија. Не го користиме толку често терминот „врежано во камен“, што може да отвори простор за поквалитетна содржина.
Исто така би додал дека гејмингот сам по себе е 3Д-професија, па од самиот почеток има многу разбирање, што е одлично.
SGA: Што ти беше првиот проект во оваа област и кои ти беа првите впечатоци од соработката?
Иван: Првиот вистински проект на којшто имавме среќа да работиме беше Cricket Manager, преку нашите пријатели во Woodblock кои имаа директна врска со клиентот. Тоа ни беше прв пат да почувствуваме каков е директниот однос помеѓу клиент и студио, и морам да кажам дека уживавме во искуството.
Сопственикот на компанијата беше огромен фанатик за 3Д и го разбираше целиот процес. Неговите коментари беа како кога надзорник за визуелни ефекти коментира на нешто, што беше супер. Беа многу поедноставни за толкување, што ни заштеди многу време во процесот.
SGA: Сега имаш друга интересна соработка што дури и заврши со престижна награда. За која игра се работеше?
Иван: NARAKA: BLADEPOINT е мултиплеер авантуристичка/акциона игра развиена од 24 Entertainment и издадена од NetEase Montreal. Battle royale тип на игра, каде што 60 играчи се борат додека не остане само еден.
SGA: Со кое студио работеше на неа?
Иван: Нашиот долгогодишен клиент Sehsucht од Хамбург имаше шанса да работи на трејлер за меѓународен еспорт турнир. Многу се израдувавме кога побараа ние да им ги изградиме асетите.
SGA: Дел од тимот на DAT беше одговорен за асетите на трејлерот. Кои улоги работеа на нив и какви алатки користеа?
Иван: На ова работеа нашите артисти за асети. Во нашето студио се трудиме да ги образоваме луѓето за да имаат повеќенаменско знаење, за разлика од големите студија, каде што ги делат улогите на 3Д-артисти, артисти за текстури, артисти за сенки. Кај нас има само една улога, артист за асети. Бидејќи сме мало студио, сметаме дека ова е важно и добро за развојот на еден артист од ниво на џуниор до сениор. Од алати ги користевме Maya, Zbrush и Arnold Renderer на проектов.
SGA: Интересно е што трејлерот заврши на наградно шоу. За што се работи и каква награда доби проектот?
Иван: Наградата SHOTS, бронзен медал за 3Д-анимација за азиско-тихоокеанскиот регион. SHOTS Creative е познат бренд во креативниот свет долго време како онлајн списание и натпревар за креативни дела во разни полиња: реклама, специјални ефекти, 3Д-анимација, и во три различни региона – Америка, Азија-Тихоокеанија и Европа-Африка-Среден Исток.
SGA: Сè повеќе се зборува за стеснување на јазот меѓу индустриите што користат слични алатки. Филм, телевизија, реклама, гејминг… Земајќи ја предвид комплексноста на проектите и сè повисоките очекувања на крајните корисници, како би сакал да придонесеш на ова?
Иван: Да, многу работи се мешаат во последно време. Го гледаме тоа на разни начини. Сакам DAT да биде група што нема да го нарушува квалитетот поради нешто друго, како масовно производство или web3 содржина и слично.
SGA: На кое друго место се надополнуваат рекламата и гејмингот?
Иван: Од нашето гледиште како креатори на содржина, нема разлика дали се работи за реклама за мобилен телефон, автомобил, детергент (не дај Боже) или трејлер за игра. Гледам дека се отвораат нови агенции или продукции ориентирани околу гејмингот, па работите веќе не одат толку често преку традиционални агенции. Би сакал мојата забелешка да е точна затоа што има многу недостатоци во традиционалниот маркетинг, особено начинот на којшто функционира и како понекогаш ги исцрпува креаторите на содржина. Во гејмингот е многу подобро, барем по наше искуство.
SGA: И конечно – какви ти се првите впечатоци од гејминг индустријата тука?
Иван: ОДЛИЧНИ! Неодамна бевме на настан на SGA (SGA Assemble) и бев позитивно изненаден од сцената, големината на заедницата и структурната организација на SGA. Имате интересни програми, Shift2Games особено ми фати око. 
Би сакал гејминг студијата да се свртат кон домашните студија кога им треба содржина, трејлери и слично, а не кон The Mill со нивниот прв милион.
